Monday, March 26, 2007

വേലിയില്‍ ഇരിക്കുന്ന പാമ്പ്‌..
(പുനഃപ്രസിദ്ധീകരണം)
മുന്നറിയിപ്പ്‌ :
മഷിനോട്ടം, ഉറുക്ക്‌ കെട്ടല്‍, ഹസ്തരേഖ, പ്രശ്നംവയ്പ്‌,മന്ത്രവാദം തുടങ്ങിയവയില്‍ വിശ്വാസമുള്ളവര്‍ തുടര്‍ന്ന് വായിക്കുന്നതിനു മുന്‍പ്‌ ദയവായി ഒരു ജ്യോത്സ്യനെ കണ്ട്‌ ഇതു വായിക്കുന്നതുകൊണ്ട്‌ എന്തെങ്കിലും ദോഷമുണ്ടാകുമോ എന്ന് ചോദിച്ചറിയുന്നത്‌ നന്നായിരിക്കും. കാരണം ഇതു വായിച്ച്‌ കഴിഞ്ഞാല്‍ സൂര്യന്‍ നില്‍ക്കുന്നിടത്ത്‌ ചന്ദ്രന്‍ കയറി നില്‍ക്കുകയോ, പാപനിരിക്കുന്നിടത്ത്‌ പുണ്യന്‍ കേറി കിടക്കുകയോ മറ്റോ ചെയ്താല്‍ കുഴപ്പമാകും. അതു എന്തായാലും വേണ്ട.ഇനി തുടര്‍ന്ന് വായിക്കുക......
രോഗം വരുമ്പോഴും, ജീവിതത്തിനു എന്തെങ്കിലും പാളിച്ച പറ്റുമ്പോഴും നമ്മള്‍ ക്ഷണിച്ചു വരുത്തുന്ന ഒരു വിപത്തുണ്ട്‌. ജോത്സ്യന്‍! അഥവാ വേലിയില്‍ ഇരിക്കുന്ന പാമ്പ്‌..! വീട്ടില്‍ ഒരാള്‍ക്ക്‌ രോഗം വന്നു. കുറച്ചു കാലം ചികിത്സിച്ചിട്ടും ഭേദമായില്ല. അല്ലെങ്കില്‍ ബിസ്സിനസ്സില്‍ പരാജയം സംഭവിച്കു. ജോലിയില്‍ പ്രശ്നമുണ്ടായി.. അങ്ങനെ സ്വാഭാവികമായി സംഭവിക്കാവുന്ന എന്തെങ്കിലുമൊക്കെ ജീവിതത്തില്‍ ഉണ്ടാകുമ്പോള്‍ അതിനെ ധൈര്യം കൊണ്ടോ പാരസ്പര്യം കൊണ്ടോ പരിഹരിക്കാന്‍ ശ്രമിക്കുന്നതിനു പകരം നേരെ ചെല്ലുന്നത്‌ ജോത്സ്യന്റെ അടുത്തേക്കാണു. അവരാണെങ്കില്‍ ഒരിര വന്ന് വീഴാന്‍ നോക്കിയിരിക്കുകയാണു. കവടി നിരത്തി ഒന്ന് പിടിച്ചു വച്ചാല്‍ മതി അയാള്‍ എല്ലാം കാണുകയായി...എന്തൊക്കെ ദോഷങ്ങളാണു അയാള്‍ കണ്ടുപിടിക്കുന്നത്‌....അത്‌ വരെ ഒരു കുഴപ്പവും ഇല്ലാതിരുന്ന വീടാണു. പെട്ടെന്ന്, ഒരു ദിവസം, ചൊവ്വയും ശനിയും ശുക്രനും സര്‍പ്പവുമൊക്കെ അവരുടെ സകലപണിയും നിര്‍ത്തിവച്ക്‌ ആ വീടിനേയും വീട്ടുകാരേയും ശരിപ്പെടുത്താന്‍ ഇറങ്ങിത്തിരിക്കുന്നു. അതാണു രോഗം!! ബിസ്സിനസ്സ്‌ പൊട്ടാനും കാരണം വേറൊന്നുമല്ല!!! ജോലിയുടെ കാര്യം പ്രത്യേകം പറയണോ? ശനിയുടെ ദൃഷ്ടിയുണ്ട്‌...അല്ലെങ്കില്‍ ചൊവ്വയുടെ സ്ഥാനം ശരിയല്ല.. അല്ലാതെ നമ്മുടെ പ്രവൃത്തികൊണ്ടാണെന്ന് സമ്മതിക്കാന്‍ നമുക്ക്‌ പ്രയാസ്സമാണു.
ആ കുടുംബത്തിന്റേയും വീട്ടുകാരുടെയും ചരിത്രമെടുത്ത്‌ നോക്കിയാല്‍ പത്തറുപതു കൊല്ലം നല്ല നിലയില്‍ കഴിഞ്ഞു പോന്നതാണു. കൃഷിയും കച്ചവടവുമൊക്കെ തരക്കേടില്ലാതെ ചെയ്തു പോന്നിട്ടുണ്ട്‌. എന്നിട്ടാണു ജ്യോതിഷി പറയുന്നത്‌, ദാ ചന്ദ്രന്‍ നോക്കുന്നു, വീടിന്റെ സ്ഥാനം ശരിയല്ല, മുറ്റത്ത്‌ നില്‍ക്കുന്ന കായിക്കുന്ന മാവ്‌ രണ്ടും വെട്ടെണം, തെക്കോട്ട്‌ വാതില്‍ പാടില്ല, നടക്ക്‌ താഴെ പഞ്ചശിരസ്സ്‌ സ്ധാപിക്കണം, അങ്ങനെ...അങ്ങനെ...എല്ലാം കൂടി ഒരു ഉശ്ശിരന്‍ കച്ചവടത്തിനു സ്കോപ്പുണ്ട്‌ ജ്യോതിഷിക്ക്‌. നഷ്ടത്തിനു മീതേ മറ്റൊരു നഷ്ടക്കച്ചവടത്തിനു വഴിമരുന്നിടുകയാണു വീട്ടുകാരന്‍.
നാല്‍പ്പതോ അമ്പതോ വയസ്സുള്ള ജ്യോത്സ്യനാണു വന്നിരുന്ന് ഇതൊക്കെ പറയുന്നതെന്ന് ഒാര്‍ക്കണം. അയാള്‍ കുത്തിയിരിക്കുന്ന പലകയ്ക്ക്‌ കാണും അയാളേക്കാള്‍ പ്രായം. അതു ആ വീട്ടില്‍ ആയുസ്സറ്റുപോകാതെ കിടക്കുമ്പോഴാണു അതിലിരുന്ന് അയാളുടെ ഒരു പ്രവചനം! ആയുസ്സിനെപ്പറ്റി!!ജ്യോത്സ്യന്‍ വെണ്ടക്കയിലോ വഴുതനങ്ങയിലോ ഇരിക്കുന്ന കാലത്ത്‌ പ്രകൃതി മുളപ്പിച്ച മാവാണു മുറ്റത്ത്‌ നില്‍ക്കുന്നതു. അതു വെട്ടണം പോലും!!സ്ഥലത്തെ വിവരമുള്ള ആശാരി സ്ഥാനം കണ്ട്‌ ഇപ്പോഴത്തെ ജ്യോത്സ്യന്റെ അപ്പുപ്പന്‍ ജ്യോത്സ്യന്‍ സമയം കുറിച്ചു കൊടുത്ത നേരത്ത്‌ പത്തറുപത്‌ വര്‍ഷം മുമ്പ്‌ പണിയിച്ച വീടിനുള്ളിലിരുന്നാണു അയാള്‍ ഇതൊക്കെ തട്ടിവിടുന്നതു..ആ വീട്ടില്‍ താമസ്സിക്കുന്നവര്‍ ഒരു പുരുഷായുസ്സ്‌ മുഴുവന്‍ ജീവിക്കുമെന്ന് അങ്ങോരു പ്രവിച്ചതൊക്കെ തട്ടിക്കളഞ്ഞു കൊണ്ടാണു ഇയ്യാളുടെ പ്രവചനം! എങ്ങനെയുണ്ട്‌ ജോത്സ്യന്‍? മുന്‍ തലമുറയേക്കാള്‍ ഇക്കാര്യത്തിലെങ്കിലും ഇവര്‍ക്ക്‌ കൂടുതല്‍ എന്തു പരിജ്ഞാനമാണുള്ളതു? കമ്പ്യൂട്ടറൊക്കെ മേടിച്ച്‌ വച്ച്‌ എല്ലാവരേയും പറ്റിക്കാനുള്ള വക്രബുദ്ധി കൂടിയിട്ടുണ്ട്‌ എന്നല്ലാതെ?
ജ്യോതിഷത്തിന്റെ സൂക്കേട്‌ ഇപ്പ്പ്പോള്‍ വളരെക്കൂടുതലാണു. ഏന്നാല്‍ അതിനു വല്ല അടിസ്ഥാനവുമുണ്ടോ? അതില്ലാതാനും. ഈ സൂര്യനും, ചന്ദ്രനും,ചൊവ്വായുമൊക്കെ എല്ലാവരേയും അങ്ങ്‌ കയറി ബാധിക്കാതെ ചിലരെ മാത്രം തിരഞ്ഞുപിടിച്ചു ബാധിക്കുന്നത്‌ എന്തുകൊണ്ടാണെന്ന് ആരെങ്കിലും ആലോചിച്ചു നോക്കിയിട്ടുണ്ടോ? ഈ ഗ്രഹങ്ങള്‍ക്കൊന്നും വേറെ പണിയില്ലെ?വേദത്തിലും പുരാണത്തിലുമൊക്കെ അധിഷ്ഠിതമാണു ജ്യോത്സ്യം എന്നാണു ഈ വിദ്വാന്മാര്‍ വച്ച്‌ കാച്ചുന്നത്‌. അവരെ വെറുതെ വിടരുത്‌. വേദത്തില്‍ അതെവിടെയാണു പറഞ്ഞിരിക്കുന്നതെന്ന് ചോദിക്കണം. ചോദിച്ചാല്‍ മാത്രം പോരാ കാണിച്ച്‌ തരാന്‍ കൂടിപ്പറയണം. സംശയം വേണ്ട. അവര്‍ ഈ പറയുന്ന ജ്യോതിഷമൊന്നും പുരാണേതിഹാസങ്ങളിലോ, വേദത്തിലോ ഇല്ല.
കാലക്രമം നിര്‍ണ്ണയിക്കാനുള്ള ജ്യോതിശ്ശാസ്ത്രത്തെക്കുറിച്ചുള്ള പരാമര്‍ശം അവിടെ കാണാം. ദിനം, തിഥി, പക്കം, ഞാറ്റുവേല, സംക്രമം തുടങ്ങിയ മനുഷ്യനു ആവശ്യമുള്ള കാര്യങ്ങള്‍ നിര്‍ണ്ണയിക്കാനുള്ള ഒരു ശാസ്ത്രം അവിടെയുണ്ട്‌. അതിനേയും ജ്യോതിഷം എന്നാണു വിളിക്കുന്നതു. പക്ഷെ അതു മറ്റേ തട്ടിപ്പല്ല! അതാണു തങ്ങളുടെ ജ്യോതിഷം എന്ന് ജ്യോത്സ്യന്മാര്‍ അവകാശവാദവുമായി വന്നേക്കാന്‍ ഇടയുള്ളതുകൊണ്ടാണു ഇതു സൂചിപ്പിച്ചതു.ജ്യോതിഷം വളരെപ്പഴക്കമുള്ളതാണെങ്കിലും ജോത്സ്യം യവന്മാരുടെ വരവോടുകൂടിയുണ്ടായതാണെന്നാണു അറിവുള്ളവര്‍ പറയുന്നത്‌. ഭാരതത്തില്‍ അതിന്റെ ആവശ്യം ഉണ്ടായിരുന്നില്ല.
ജീവതത്തിന്റെ അന്തഃസത്ത മനസ്സിലാകാത്തവരാണു പൊതുവെ ഭാവിയെക്കുറിച്ച്‌ ഉല്‍കണ്ഠാകുലരാകുന്നത്‌. അവരെ പറ്റിക്കുവാന്‍ വേണ്ടി ഉടലെടുത്ത വര്‍ഗ്ഗമാണു ജ്യോത്സ്യന്മാര്‍. തട്ടിപ്പിനു ഒരു ഗൗരവമൊക്കെ വരാന്‍ വേണ്ടിയാണു സംഗതി ദൈവീകമാണെന്നൊക്കെ പറയുന്നത്‌. ദൈവത്തിനു ഇതില്‍ ഒരു പങ്കുമില്ല!ജ്യോത്സ്യത്തിന്റെ ആധികാരികത സ്ഥാപിക്കാന്‍ രാമന്റെ ജാതക കര്‍മ്മത്തെക്കുറിച്ചൊക്കെ പറയാറുണ്ട്‌. സൂക്ഷ്മമായി പരിശ്ശോധിച്ചാല്‍ അങ്ങനെയൊരു ഗ്രഹനില ഉണ്ടാകാന്‍ പ്രയാസമാണു. ആത്മാവ്‌ മനുഷ്യരൂപമെടുക്കുന്നതിനു യോജിക്കുന്ന ഒരു കാവ്യകല്‍പ്പന മാത്രമാണു അതു. അല്ലാതെ അത്തരം ഒരു യോഗത്തില്‍ ഒരാള്‍ ജനിക്കുന്നു എന്നര്‍ത്ഥമില്ല. അങ്ങനെ ഒരു ഗ്രഹനിലയുണ്ടായാല്‍ എപ്പോള്‍ വേണമെങ്കിലും ഒരു മനുഷ്യന്‍ അതില്‍ ജനിച്ചുകൂടായ്കയുമില്ല. അപ്പോള്‍ ദൈവത്തിന്റെ അവതാരം എന്ന് പറയുന്നതിനു എന്ത്‌ പ്രത്യേകത? അങ്ങനെ ഒരു ഗ്രഹനിലയുണ്ടാവാനേ പാടില്ല എന്ന് ചുരുക്കം. പുരാണപ്രസിദ്ധരായ കഥാപാത്രങ്ങള്‍ ആരും തന്നെ ജ്യോത്സ്യന്മാരെ സമീപിക്കുന്നതായി എവിടെയും കാണുന്നുമില്ല. അതു കൊണ്ട്‌ ഈ ജ്യോത്സ്യം എന്ന് പറയുന്ന ഏര്‍പ്പാട്‌ ശാസ്ത്രസമ്മതമുള്ളതോ ആചാരപരമോ അല്ല.
ശ്രീരാമന്‍ കാട്ടില്‍ പോകുന്നതിനു മുന്‍പ്‌ കൗസല്യ പ്രശ്നം വയ്പിച്ചോ? സംഗതികള്‍ കുഴഞ്ഞുമറിയുന്നൂ എന്ന് കാണുമ്പോള്‍ കുറഞ്ഞ പക്ഷം ലക്ഷ്മണനെങ്കിലും ഒരു ജ്യോത്സ്യനെ തേടിപ്പോകേണ്ടതായിരുന്നു. അതും സംഭവിച്ചില്ല. രാജാക്കന്മാര്‍ എന്നൊക്കെ പറയുന്നവര്‍ ആര്‍ക്കീറ്റയിപ്പുകളാണു. സമൂഹത്തെ ശാസ്ത്രം പഠിപ്പിക്കുവാനുള്ള കഥാപാത്രങ്ങള്‍! ജ്യോത്സ്യം ഒരു ശാസ്ത്രമായിരുന്നെങ്കില്‍ ഏതെങ്കിലും ഒരു കഥാപാത്രത്തെക്കൊണ്ട്‌ അതു സൂചിപ്പിക്കുമായിരുന്നു. അതുണ്ടായില്ല.
പാണ്ഡവ സഹോദരനായ നകുലന്‍ ജ്യോതിഷത്തില്‍ അതീവ നിഷ്ണാതനാണെന്ന് മഹാഭാരതം പറയുന്നുണ്ട്‌. ആ ജ്യോതിഷം ഇന്നത്തെ ജ്യോത്സ്യമായിരുന്നെങ്കില്‍ ഭാവിയെക്കുറിച്ചറിയാന്‍ ആരെങ്കിലുമൊക്കെ വരുമായിരുന്നില്ലെ? കുറഞ്ഞപക്ഷം സ്വന്തം വീട്ടുകാരെങ്കിലും? പക്ഷെ, ഒന്ന് പ്രശ്നം വയ്പിക്കാന്‍ സ്വന്തം ജ്യേഷ്ഠന്മാര്‍ പോലും അയാളെ സമീപിച്ചതായി കാണുന്നില്ല. എന്തോരം കഷ്ടപ്പാടാണു ആ അമ്മയും മക്കളും അനുഭവിച്ചതു. എന്നിട്ടുമൊന്ന് കവടിവയ്പിക്കാന്‍ അവര്‍ക്ക്‌ തോന്നിയില്ലല്ലോ? പോട്ടെ, സ്വയമൊന്ന് വാരിപ്പിടിക്കണമെന്ന് നകുലനുപോലും തോന്നിയില്ല.
പാമ്പില്‍ത്തന്നെ ചില രാജവെമ്പാലകള്‍ ഉണ്ട്‌. വിഷം മുറ്റിയ വര്‍ഗ്ഗം! ദേവപ്രശ്നം നടത്തുന്നവര്‍. ദേവജ്ഞര്‍ എന്നൊക്കെ അവരെക്കേറി വിളിച്ചെന്നിരിക്കും. അതില്‍ സത്യമൊന്നുമില്ല. അത്യാര്‍ത്തിക്കാര്‍ എന്ന് വിളിക്കുന്നത്‌ മോശമായതുകൊണ്ടാണു ദേവജ്ഞര്‍ എന്ന് വിളിക്കുന്നത്‌. ദേവലോകങ്ങളെക്കുറിച്ചുള്ള ജ്ഞാനമൊന്നും അവര്‍ക്ക്‌ ഉണ്ടെന്നു തോന്നുന്നില്ല. ധനലോകത്താണു അവരുടെ കണ്ണ്‍! എന്നിട്ട്‌ അടിച്ച്‌ വിടുന്ന ഗീര്‍വ്വാണങ്ങളോ? "ദാ, ഞാന്‍ ഇപ്പോള്‍ ഭഗവാനെ കാണുകയാണു. ഞാന്‍ ചോദിച്ചു. നിങ്ങള പറയുന്നതൊന്നും അങ്ങ്‌ ട്‌ പിടിക്കിണില്യാ" ഈ പറയുന്നതു കേട്ടാല്‍ തോന്നും അയാള്‍ ദേവന്റെ കാര്യസ്ഥനാണെന്ന് അല്ലെങ്കില്‍ വകേലൊരു അളിയനാണെന്ന്. അയാളോട്‌ നമ്മള്‍ ഒരു ചോദ്യം ചോദിക്കുന്നു. ഭഗവാനെക്കാണുന്ന തനിക്കെന്താ കുറ്റക്കാരെ തെളിവുസഹിതം പേരെടുത്തങ്ങ്‌ പറഞ്ഞാല്‍? ഭഗവാനെക്കാണാന്‍ കണ്ണുണ്ടെങ്കില്‍ മനുഷ്യനെ കാണാനാണോ പ്രയാസം! പക്ഷെ പറയില്ല. കാരണം സംഗതി മൊത്തം തട്ടിപ്പാണെന്ന് അയാള്‍ക്കറിയാം. അയാള്‍ക്ക്‌ തന്നെ വിശ്വാസമില്ല ആ പറയുന്നതിലൊന്നിലും. പിന്നെ തടി കേടാക്കാന്‍ എന്തിനാ ആരുടെയെങ്കിലും പേര്‍ പറയുന്നത്‌??? അല്ലാതെ തന്നെ അമ്പലം കമ്മറ്റിക്കാരും സപ്താഹക്കാരും, പരിഹാരക്രിയക്ക്‌ ഒഴിവുകാണുന്ന പുരോഹിതന്മാരും, കോണ്ട്രാക്ടറന്മാരും ചേര്‍ന്ന് വേണ്ട കമ്മീഷന്‍ കൊടുക്കുന്നുണ്ട്‌.
ഇനിയും വേലിയിലിരിക്കുന്ന പാമ്പിനെ എടുത്ത്‌ വേണ്ടാത്തിടത്ത്‌ വയ്ക്കണമെന്ന് തോന്നുന്നുണ്ടെങ്കില്‍ അതു നിങ്ങളുടെ വിധി. അത്ങ്ങട്‌ അനുഭവിച്ചു തീര്‍ക്ക്വാ. അല്ലാതെന്താ.
ശംഭോ മഹാദേവ!!
പിന്നറിയിപ്പ്‌:
ഈ ബ്കോഗില്‍ എഴുതിയിരിക്കുന്ന എന്തും ആര്‍ക്കും എവിടെയും ഉപയോഗിക്കാവുന്നതാണു. കോപ്പീറൈറ്റ്‌ നിയമം ബാധകമയിരിക്കുന്നതല്ല. അങ്ങനെ ഉപയോഗിക്കുമ്പോള്‍ ഉണ്ടാകുന്ന ശാരീരികമോ, മാനസ്സികമോ, സാമ്പത്തികമോ ആയ കഷ്ട നഷ്ടങ്ങള്‍ക്കൊന്നും പക്ഷെ ബ്ലോഗുടമ ഉത്തരവാദി ആയിരിക്കുന്നതല്ല.അതങ്ങ്‌ സ്വയം സഹിച്ചോണം.

31 comments:

Kaithamullu said...

ഒരിക്കല്‍( എന്റെ അച്ഛന്‍ മരിച്ചതിന്റെ അടുത്ത ആഴ്ച) ഞാനും വേലിയിലെ ഈ പാമ്പിനെയെടുത്ത്, ജീവിതത്തിലാദ്യമായി, അരയില്‍ ചുറ്റിയിട്ടുണ്ട്.പാലക്കാട് വടക്കെയറ്റത്തുള്ള ഇദ്ദ്യേം എന്നെ കണ്ടയുടനെ ചോദിച്ചത് “ ആരാ ഈയടുത്ത് മരിച്ചത്, അച്ഛനോ അമ്മയോ” എന്നായിരുന്നു. അച്ഛനെ ദൈവത്തേപ്പോലെ കരുതിയിരുന്ന, ആരാധിച്ചിരുന്ന എന്നെ വീഴ്ത്താന്‍ വേറെന്ത് വേണം?

എന്തായാലും രണ്ടുകൊല്ലത്തോളം എന്നെ വട്ടം കറക്കിയ ആ മാന്യനെ, തനിനിറം മനസ്സിലാക്കിയപ്പോള്‍, മാന്യമായിത്തന്നെ ഞാന്‍ കഴുത്തിനു പിടിച്ച് പുറത്താക്കി.

-അശോക്, നല്ല പോസ്റ്റ്!

ആഷ | Asha said...

കണ്ണു തുറപ്പിക്കുന്ന ലേഖനം.

Unknown said...

പ്രശ്നവശാല്‍ ആ കോപ്പീറൈറ്റിനെ പറ്റി പറഞ്ഞത് കേമായേട്ക്കുണൂ, നോന് ‘ക്ഷ’ പിടിച്ചിരിക്കുണൂന്ന് പറഞ്ഞാല്‍ തീര്‍ന്നൂലോ ല്ല്യേ?

Sathees Makkoth | Asha Revamma said...

പ്രശ്നത്തിന്റെ പ്രശ്നക്കേട് ബോധിച്ചു.
പാരഗ്രാഫ് തിരിച്ച് എഴുതിയാല്‍ ഇമ്മിണീ കൂടുതല്‍ വായനാസുഖം കിട്ടും.
നീപ്പോ പ്രശ്നവശാല്‍ അത് ശരിയാവില്ലന്നുണ്ടോ?

അശോക് കർത്താ said...

അപ്പോ കൈതമുള്ളിന്റെ ലഗ്നത്തിലെ കേതു പോയെന്ന് ചുരുക്കം. ധനലാഭവും മനഃസമാധാനവും ഫലം.
ആഷക്ക്‌ സൂര്യനുച്ചസ്തനായി... ഭേഷ്‌
ചുരുക്കത്തില്‍ ദില്‍ബാസുരനു കാര്യം പിടി കിട്ടി...ഹ..ഹ...വ്യാഴത്തിലേക്ക്‌ ശുക്രന്‍ നോക്കുന്നുണ്ട്‌. പിന്നിലേക്കും ഒരു നോട്ടം ഉണ്ടായിരിക്കുന്നതു നല്ലതാണു. എവിടെന്നാ എന്തൊക്കെയാ വരണതെന്ന് പറയാന്‍ പ്റ്റ്വോ? സൂക്ഷിച്ചിരിക്യ...

വേലിയില്‍ ഇരിക്കുന്ന പാമ്പിനെ താലോലിക്കാന്‍ താല്‍പ്പര്യമുള്ളവര്‍ ഇനിയും വരിക..... ഇതുപോലെ ഒരവസരം ഇനി കിട്ടിയെന്നു വരില്ല....ഇതു രണ്ടാം വട്ടം............

kaderiblogspot said...

kalakki kaarthaa kalakki... kemayirikkunu

Leaves of Mind said...

"Work" അശോകേട്ടാ ജോത്സ്യന്മാരെപ്പോലെ തന്നെ കുഴപ്പക്കാരാ പൂജാരികളും. ഒരു സ്നേഹിതന്റെ അച്ഛന്‍ മരിച്ചു. 16 അടിയന്തിരവും കഴിഞ്ഞു. ഞങ്ങളുടെ പൊതു സുഹൃത്തായ ഒരു ഏമ്പ്രാന്തിരി കണ്ടുമുട്ടിയപ്പോള്‍ ചോദിച്ചത്‌ കേക്കുക, " എന്റെ ഉണ്ണീ നമ്മള്‍ തമ്മില്‍ ഇത്ര അടുത്തറിയാമായ്യിരുന്നിട്ടും നിന്റെ അച്ഛന്റെ 'വര്‍ക്ക്‌' നീ മാമ്പള്ളിക്കാര്‍ക്ക്‌ കൊടുത്തല്ലോ?"
സംഗതി കലക്കി.

Unknown said...

ഹ ഹാ‍ാ‍ാ‍ാ....

ല്ലിവ്സ് ഓഫ് മൈന്റേ.... എനിക്ക് വയ്യാ.. :-D

Leaves of Mind said...

എന്നതാ ദില്‍ബാസുരനു ഒരേനക്കേട്‌?

sandoz said...

പോസ്റ്റ്‌ കലക്കി.....

[ലീവ്സ്‌ ഓഫ്‌ മയിന്റേ....ദില്‍ബന്‍ താങ്കളുടെ തമാശ കേട്ട്‌ ചിരിച്ചതല്ലേ..എനിക്കും ചിരി വന്നു ആ കീറു കേട്ടു...അതിനെ ഇങ്ങനെ ഏനക്കേട്‌ എന്നൊക്കെ വിളിച്ചാലോ...ഒരു പ്രതിപക്ഷ ബഹുമാനം ഇല്ലാതെ...]

Unknown said...

ഏയ്,
സാന്റോസേ കുഴപ്പം എന്റെ ഭാഗത്താണ്. ഞാന്‍ പോസ്റ്റിന്റെ പേര് ശ്രദ്ധിയ്ക്കാതെ ഒരു ജോക്ക് അപ്രീഷ്യേറ്റ് ചെയ്യാന്‍ പോയതാ. ആരെ പറഞ്ഞാല്‍ മതി? :-)

Leaves of Mind said...

ഇങ്ങനെ കണ്ണില്‍ ചോരയില്ലാതെ പറയല്ലെ സാന്റോ, ദില്‍ബു....അച്ഛന്റെ 16 ഒക്കെ work എന്നു പറഞ്ഞാ....കരഞ്ഞു പോകും.

Leaves of Mind said...

ദില്‍ബാസുരനെ തെറ്റിദ്ധരിച്ചതിനു മാപ്പ്‌.

ലുട്ടാപ്പി::luttappi said...

ashokan karthayude vyazham shaniyilekku t

ലുട്ടാപ്പി::luttappi said...

ashokan karthayude vyazhathil shani keri pidichu.. athanu ingine okke ezhuthan thonnan kaaranam.... budhanu rakshikkan varanamennundu pakshe traffic block karanam varan pattunnilla.....

macha.... my father was also a famous jyothishi.... but i never believe in this... now i am gona take a printout of this and distribute all the people who argues about it... copy right case onnum kodukkillalloo.

അശോക് കർത്താ said...

ലുട്ടാപ്പിക്കുട്ടാ അക്ഷരക്കഷായം ബ്ലോഗില്‍ വരുന്ന ഒന്നിനും കോപ്പീറൈറ്റ്‌ നിയമം ബാധകമല്ല. പിങ്കുറിപ്പ്‌ വായിച്ചില്ലേ. യൂണിവേര്‍സല്‍ റൈറ്റാണു.

- കുമാരേട്ടന്‍ - said...

“പുരാണപ്രസിദ്ധരായ കഥാപാത്രങ്ങള്‍ ആരും തന്നെ ജ്യോത്സ്യന്മാരെ സമീപിക്കുന്നതായി എവിടെയും കാണുന്നുമില്ല.“ മുതലായ ബള്‍ന്ടറുകള്‍ ഒഴിവാക്കണം. ദേവാംശമുള്ള ,നിങ്ങള്‍ പരാമറ്ശിച്ചിരിക്കുന്ന കഥാപാത്രങ്ങള്‍ ഗുരുകുല വിദ്യാഭ്യാസ കാലത്തു തന്നെ ജ്യോതിഷം പടിക്കുന്നുണ്ട്. അവര്‍ക്കു ദേവഗുണം കൂടുതല്‍ ഉള്‍ലതിനാല്‍ ഇവ നോക്കെണ്ടതില്ല എന്ന് പുരണങങളില്‍ പരാമര്‍ശിക്കുന്നുണ്ട്.
അവരുടെ ര്‍ണ്ടാം തലമുറ മുതല്‍ ജ്യോതിഷം നോക്കുന്നുമുണ്ട്.
പിന്നെ കുമാരേട്ടന്‍ ഇതിലോന്നും തെല്ലും വിശ്വാസം ഇല്ല കേട്ടോ...........

അശോക് കർത്താ said...

ആ ജ്യോതിഷം ജ്യോതിശ്ശാസ്ത്രമാണു കുമാരേട്ടാ. അല്ലാതെ യവനമായ ഭാവി പ്രവചനമല്ല. ഇന്നത്തെ ജോത്സ്യം തട്ടിപ്പു തന്നെയാണു.

sanju said...

അശൊകേട്ടാ.നല്ല ലേഖനം.
മനുഷ്യന്റെ ചില weakness-കളെ ചൂഷണം ചെയ്യുന്ന മറ്റൊരു കൂട്ടര്‍ !

... said...

മാഷെ ലേഖനം വളരെ നന്നായിട്ടുണ്ട്‌.ഈ വിഷയത്തെ കുറിച്ച്‌ പറഞ്ഞപ്പോഴൊക്കെ എനിക്ക്‌ വളരെ അധികം കേള്‍ക്കേണ്ടിവന്നിട്ടുണ്ട്‌....അതുകൊണ്ട്‌ തന്നെ ഇതിനെ കുറിച്ച്ക്‌ കൂടുതല്‍ അറിയാന്‍ എനിക്ക്‌ ആഗ്രഹം ഉണ്ട്‌...ജോത്സ്യം ശരിക്കും ഒരു ഭാരതസംസ്കാരമെ അല്ല. സംസ്കാരങ്ങളുടെ കൈമാറ്റ കേന്ദ്രങ്ങളില്‍ എവിടെയോവച്ച്‌ നമ്മള്‍ പെറുക്കിയെടുത്തതല്ലെ ഇത്‌.ആര്‍ഷഭാരതത്തിലെ ജോതിഷം ഒരു നിരീക്ഷാത്മക ശാസ്ത്രം മാത്രമായിരുന്നു.ബാബിലോണിയയിലായിരുന്നു ജോത്സ്യം അതായത്‌ തങ്ങളുടെ ജയപരാജയങ്ങളുടെ കാര്യകാരണങ്ങള്‍ ഗ്രഹങ്ങളുടെ തലയില്‍ കെട്ടിവയ്ക്കുന്ന പരിപാടി ആദ്യം തുടങ്ങിയത്‌ എന്ന് എവിടെയോ വായിച്ചത്‌ ഓര്‍ക്കുന്നു,അനിശ്ചിതാവസ്തയില്‍ സ്വന്തം നാടുവിട്ട്‌ പലായനം ചെയ്ത ബാബിലോണിയന്‍ ജനത ഗ്രീക്കിലും മറ്റും ഈ സംസ്കാരം പടര്‍ന്നുപിടിക്കാനിടയാക്കി.അലക്സാണ്ടര്‍ ചക്രവര്‍ത്തിയുടെ പടയോട്ടകാലത്തണ്‌ ഇന്ത്യയില്‍ ഈ സംസ്കാരം എത്തുന്നത്‌...ഇസ്ലാം മതത്തിന്റെ കര്‍ശന നിലപാട്‌ ഇസ്ലാം രാഷ്ട്രങ്ങളെ ഇതില്‍ നിന്നും ഒരു പരിതിവരെ മാറ്റിനിര്‍ത്തിയിട്ടുണ്ട്‌.ശാസ്ത്രപുരോഗതിയിലൂടെ യൂറോപ്പ്യന്‍ രാഷ്ട്രങ്ങളും ഇതില്‍ നിന്നും വഴിമാറിനടന്നിട്ടുണ്ട്‌.പക്ഷെ നമ്മുടെ നാട്ടില്‍ മാത്രം ഇത്‌ കൂടുതല്‍ സക്തിപ്പെടുകയാണ്‌..

മാഷിനോര്‍മയുണ്ടോ കുറച്ച്‌ വര്‍ഷങ്ങള്‍ക്ക്‌ മുന്‍പ്‌ ജോത്സ്യം ഒരു പഠനവിഷയമാക്കുമെന്നൊക്കെ ഒരു വാര്‍ത്ത ഉണ്ടായിരുന്നു....ശാസ്ത്രം എന്ന പദം വളരെ അധികം തെറ്റിദ്ദാരണ വരുത്തിവച്ചിട്ടുണ്ട്‌.ഇംഗ്ലീഷിലെ സയന്‍സ്‌ എന്ന പദത്തിന്‌ പകരം ശാസ്ത്രം എന്ന വാക്ക്‌ ഉപയോഗിക്കുന്നിടത്തണ്‌ കുഴപ്പം എന്നു തോന്നുന്നു...സംസ്കൃതത്തില്‍ ശാസിക്കപ്പെടെണ്ടതണ്‌ ശാസ്ത്രം.ഗുരുവിന്റെ ശാസനയാണ്‌ പ്രമാണം.എന്നാല്‍ സയന്‍സില്‍ ശാസനയ്ക്‌ വിലയില്ല.യുക്തിക്കും പരീക്ഷണ നിരീക്ഷണങ്ങളിലൂടെയും എത്തിച്ചേരുന്ന നിഗമനങ്ങള്‍ക്കും മാത്രമെ വിലയുള്ളൂ..അങ്ങനെ വരുമ്പോള്‍ പേരിലുള്ള ശാസ്ത്രം പോലും ജ്യോല്‍സ്യത്തിന്‌ ഒരു സയിന്റിഫിക്ക്‌ പരിവേഷം നല്‍കുന്നില്ലാ അല്ലെ മാഷെ....

അശോക് കർത്താ said...

ഈകുട്ടി(ഗോപിക) പറഞ്ഞതു 100%വും ശരിയാണു. ജ്യോതിഷം യവനമായതു എങ്ങനെ എന്ന് പറഞ്ഞു. വളരെ നല്ലകാര്യം. ജ്യോതിഷത്തില്‍ ബിരുദപഠനം തുടങ്ങാന്‍ ഉദ്ദേശിച്ചിരുന്നതു കേരള സര്‍വ്വകലാശാല തുടങ്ങുക തന്നെ ചെയ്തു. ഇപ്പോഴുമുണ്ട്‌. ജ്യോതിഷം ഒരു തൊഴിലായി സ്വീകരിക്കുന്നതില്‍ തെറ്റുണ്ടോ? മനുഷ്യരെ പറ്റിക്കുന്നതാണിതെന്ന് പറയുമ്പോള്‍ അത്തരം എത്രയോ വ്യാജശാസ്ത്രങ്ങള്‍ നമുടെ യൂണിവേര്‍സിറ്റികള്‍ പഠിപ്പിക്കുന്നു. പിന്നെ ശാസ്ത്രം ശരിയായി പഠിച്ചിട്ടും അതു തെറ്റിനും വ്യാജത്തിനും ഉപയോഗിക്കുന്നവ വേറെ എത്രയോ ഉണ്ട്‌. ഉദാഹരണം, സി.എ. അതിന്റെ പ്രിന്‍സിപ്പിളനുസരിച്ചാണു അവര്‍ പ്രവര്‍ത്തിക്കുന്നതു എന്ന് വിചാരിക്കുന്നുണ്ടോ? അവരുടെ കണക്കു പ്രകാരമാണു നമ്മുടെ റവന്യു നിശ്ചയിക്കുനതു. അതു കുറ്റംറ്റതല്ലെങ്കില്‍? പിന്നെ ഡോക്ടറന്മാര്‍? ഓരോനിമിഷവും അവര്‍ പ്രതിജ്ഞ ലംഘിക്കുകയല്ലെ? എഞ്ജിനിയറന്മാര്‍? പണികഴിയും മുമ്പേ തകരുന്ന പാലങ്ങള്‍, കെട്ടിടങ്ങള്‍...അവര്‍ക്കെതിരെ വേറെ തെളിവുകള്‍ ആവശ്യമുണ്ടോ? പൊതു ധനവും ജീവനും അപകടത്തിലാക്കുന്ന ഇത്തര്‍ക്കാരുടെ പ്രവര്‍ത്തി വച്ചുനോക്കുമ്പോള്‍ ജ്യോതിഷികള്‍ അത്ര വലിയ ദ്രോഹം ചെയ്യുന്നുണ്ടോ? ഇനി അതും പോകട്ടെ...സാമൂഹികമായി അവര്‍ ദ്രോഹം ചെയ്യുന്നു എന്ന് വിചാരിച്ചാല്‍...'വൈകിട്ടെന്താ പരിപാടിയെന്ന്' ചോദിക്കുന്ന സിനിമാതാരത്തേക്കാള്‍ വലിയ വിപത്താണോ ഇവര്‍? ആലോചിച്ച്‌ നോക്കു. എന്നു കരുതി ജ്യോതിഷം വേണമെന്ന് ഞാന്‍ പറയില്ല. മുന്‍പ്‌ പറഞ്ഞ ശാസ്ത്രങ്ങള്‍ ഉല്‍പ്പെടെ.

ദേവന്‍ said...

അശോക്‌ കര്‍ത്തായുടെ ജന്മദിനം നാളെയാണെന്ന് ഓര്‍ക്കുട്ടില്‍ കണ്ട്‌ ഞാന്‍ ഡീറ്റെയിത്സ്‌ ജ്യോതിഷാചാര്യന്‍ ഡോ. വാറ്റുകലം ഗീതാകൃഷ്ണനു അയച്ചുകൊടുത്തു. അദ്ദേഹം തന്റെ ശാസ്ത്രീയമായ കമ്പ്യൂട്ടറൈസ്ഡ്‌ രീതി അനുസരിച്ച്‌ അത്‌ വിശദമായി വിശകലനം ചെയ്ത്‌ റിസല്‍റ്റ്‌ അയച്ചിട്ടുണ്ട്‌, എങ്കിലും അദ്ദേഹത്തിന്റെ കമ്പ്യൂട്ടറിനു ട്രോജന്റെ അപഹാരമുള്ള കാലമായതിനാല്‍ റിസല്‍റ്റ്‌ എനിക്കു തുറന്നു വായിക്കാന്‍ പറ്റിയില്ല. തുടര്‍ന്ന് ആഴ്ച്ചയില്‍ 15 മിനുട്ട്‌ മാത്രം ദുബായി സന്ദര്‍ശിക്കുന്ന പ്രൊഫസ്സര്‍ കോത്താഴം കാലന്‍ സോറി ത്രികാലന്‍ നമ്പൂതിരിപ്പെടാപ്പാടിനെ കാണിച്ചു. ഫലം പറഞ്ഞത്‌ ഇങ്ങനെ.

അശോകിനു നല്ലകാലത്തു മേല്‍ഗതിയുണ്ടാവുമെങ്കിലും കഷ്ടകാലത്ത്‌ കഷ്ടനഷ്ടങ്ങളുണ്ടാവും. എന്നാല്‍ അതില്‍ ഭയക്കാന്‍ ഒന്നുമില്ല, പരിഹാരങ്ങളും നിര്‍ദ്ദേശിച്ചിട്ടുണ്ട്‌.

1. സമയദോഷം മാറാന്‍ സമയനിര്‍ണ്ണയ മഹായന്ത്രം വാങ്ങി ഇടം കയ്യില്‍ മണിബന്ധത്തില്‍ ബന്ധിക്കുക. യന്ത്രം എച്ച്‌ എം ടി ആയിരുന്നാല്‍ ഏറ്റവും നല്ലത്‌.

2. ആദിത്യന്റെ (ബ്ലോഗറല്ല) അപഹാരം കഴിഞ്ഞ്‌ ഇപ്പോള്‍ മൂന്നില്‍ ചൊവ്വയും നാലില്‍ വെള്ളിയും അഞ്ചില്‍ ചന്ദ്രനും ഏഴിന്‍ ഇന്‍സാറ്റ്‌ 1D യും സഞ്ചരിക്കുന്നു. നവഗ്രഹ പൂജ നടത്താനുള്ള പതിനായിരം രൂപ ദേവന്‍, അക്കൌണ്ട്‌ നമ്പ്ര 317/1999 എച്‌ എസ്‌ ബി സി ദുബായി ബ്രാഞ്ചിലേക്ക്‌ അയക്കുക. പണത്തിന്റെ അളവ്‌ അനുസരിച്ച്‌ നവഗ്രഹങ്ങള്‍
ദൂരോട്ട്‌ ദൂരോട്ട്‌ പോയിക്കിട്ടും

3. അശോക്‌ ഇപ്പോള്‍ താമസിക്കുന്ന വീടു നില്‍ക്കുന്നയിടത്ത്‌ മൂവായിരം കൊല്ലം മുന്നേ ജീവിച്ചിരുന്ന ഒരു ബ്രാഹ്മണനെ അയാള്‍ടെ അന്തര്‍ജ്ജനം ചിരവക്ക്‌ തലക്കടിച്ചു കൊന്നിട്ടുണ്ട്‌. പരീതിന്റെ, സോറി പരേതന്റെ ആത്മാവ്‌ ബ്രഹ്മരക്ഷസ്സായി കുടുംബത്തിനു മീതേ ചക്കാട്ടുന്ന കാള പോലെ വട്ടത്തില്‍ ചുറ്റുകയാണ്‌. ഈ രക്ഷസ്സ്‌ ഒഴിഞ്ഞു പോകാന്‍ വീട്ടിലിരിക്കുന്ന ചിരവ എടുത്ത്‌ അടുപ്പിലിടുക. ചിരവ കത്തുമ്പോള്‍ ഒരു കുരവ കൂടി ഇട്ടാല്‍ ബ്രാഹ്മണശ്ശാപം മൊത്തമായി തീര്‍ന്നു കിട്ടും.

4. മുറ്റത്ത്‌ തെങ്ങു നില്‍ക്കുന്ന സ്ഥാനം ശരിയല്ല, ജെ സി ബി കൊണ്ട്‌ തെങ്ങ്‌ മൂടോടെ മാന്തി മൂന്നടി തെക്കു കിഴക്ക്‌ വീണ്ടും നാട്ടുക (ജെ സി ബി ഞാന്‍ പറയുന്ന ഏജന്റുമാരുടെ പക്കല്‍ നിന്നേ വാങ്ങാവൂ)

5. ശത്രുക്കള്‍ ഒരുപാടുള്ളതായി കാണുന്നു. സ്വയരക്ഷക്ക്‌ ഒരു ബാരറ്റയന്ത്രം പൊന്നമ്പലത്തിനോട്‌ വാങ്ങിച്ച്‌ അരയില്‍ ധരിക്കുക. ഉണ്ട അതില്‍ തന്നെ ഇടാന്‍ പ്രത്യേകം ശ്രദ്ധിക്കണം, യാതൊരു കാരണവശാലും ലാപ്പ്‌ ടോപ്പ്‌ ബാഗില്‍ ഇടാന്‍ പാടില്ല,മാനഹാനിയുണ്ടാവും. ഭീതിയകറ്റാന്‍ "ഓം പച്ചാള ശ്രീനിയായ യമഹ" എന്നു ജപിച്ചാല്‍ മതിയാവും

6. സര്‍വ്വൈശ്വര്യത്തിനായി എന്നും രാവിലെ കുളിച്ചിട്ട്‌ ഒരു കുടുക്കയില്‍ അഞ്ചു രൂപ വീതം നിക്ഷേപിക്കുക. അത്‌ വലിയൊരു തുക ആയ ശേഷം ഞാന്‍ വന്ന് വേണ്ട വിധം പ്രയോജനപ്പെടുത്തി തന്ന്
സഹായിക്കുന്നതാണ്‌.

7. കുട്ടിച്ചാത്തന്‍ സേവയുണ്ടായിരുന്ന ഒരു മഹാദിവ്യന്‍ അശോകിന്റെ വീട്ടിന്റെ 100 മീറ്റര്‍ അകലെ വച്ച്‌ 7001 വര്‍ഷം മുന്നേ തേങ്ങാ തലയില്‍ വീണു ഭൂസമാധിയടഞ്ഞിട്ടുണ്ട്‌. അദ്ദേഹത്തിന്റെ പ്രീതിക്കായി സന്തതി പരമ്പരയില്‍ പെട്ട കൊല്ലം ജില്ലയില്‍ ശക്തികുളങ്ങര താലൂക്കില്‍ ജീവിക്കുന്ന ആട്ടോക്കലാധരന്‍ എന്നയാളിനു മദ്യവും കോഴിയും സമര്‍പ്പിക്കുക. മദ്യം കടല്‍ താണ്ടി എത്തിയതും കോഴി തിരുവനന്തപുരം എന്നും കോഴി എന്നും മൂല എന്നും പേരില്‍ വരുന്ന ഹോട്ടലിലെയും ആയാല്‍ ഏറ്റവും നല്ലത്‌. സോഡ ഞങ്ങള്‍, സോറി അദ്ദേഹം തന്നെ വാങ്ങിക്കോളും.

ഇതില്‍ പരിഹാരം കണ്ടില്ലെങ്കില്‍ മറ്റു കര്‍മ്മങ്ങള്‍ക്കായുള്ള ഒരു ചാര്‍ത്ത്‌ ഞാനങ്ങോട്ട്‌ ചാര്‍ത്തിത്തരാം.

Unknown said...

ദേവേട്ടാ,
കൂടാതെ കാലകോയിങ്ങല്‍ ചാത്തന് സ്വര്‍ണ്ണം കൊണ്ട് ഗോളക, പഴവന്നൂരമ്മയ്ക്ക് ഉണ്ടമ്പൊരി, ചോമന്നൂരപ്പന് സില്‍ക്ക് ലുങ്കി തുടങ്ങിയ പരിഹാരങ്ങളുമില്ലേ? :-)

ഇന്‍ഡ്യാഹെറിറ്റേജ്‌:Indiaheritage said...

ഹെന്റെ ദേവന്‍ ജീ,
ഈ ദുര്‍മരണമടഞ്ഞ പ്രേതങ്ങളൊന്നും കയ്യോടെ ലെവന്മാരെ അങ്ങു കൈകാര്യം ചെയ്യാതെ മൂവായിരം കൊല്ലം കഴിഞ്ഞു എന്തിനാണാവോ പോലും വരുന്നത്‌?
ഹാ ജ്യോതിഷിക്കും ജീവിക്കണ്ടെ അല്ലേ?
കലക്കി

അശോക് കർത്താ said...

ഹെന്റെ ദേവഞ്ജീ സംഗതി കലക്കി. ദില്‍ബാസുര്‍ജിയും ഇന്‍ഡ്യാ ഹെറിറ്റേജും കൂടിച്ചേര്‍ന്നപ്പോള്‍ ഗംഭീരം!!

അശോക് കർത്താ said...

ദേവന്‍ ജി വെറ്റമുക്കിലാണോ ആട്ടോക്കലാധരന്റെ വീട്‌?

Sapna Anu B.George said...

വളരെ നല്ല പോസ്റ്റ്,അശേക്.പിന്നെ ശാസ്ത്രം എന്നതിലുപരി, ഇതൊരു ‘പോസിറ്റീവ് എനെര്‍ജി’‍ കൂടിയാണ്. മാനസിമായി ശക്തി കുറഞ്ഞമനുഷ്യരാണ്,അനാവശ്യമായ ഇത്തരം കാര്യങ്ങളില്‍ കൂടുതല്‍ ശ്രദ്ധ തിരിക്കുന്നത്. ആയിരം വര്‍ഷങ്ങളായി നമ്മുടെ സംസ്ക്കാരം ആചരിച്ചു വരുന്ന അനുമാനങ്ങളും രീതികളും, ഒറ്റയടിക്കങ്ങു ഉപേക്ഷിക്കാന്‍ പറ്റില്ലല്ലോ? നമ്മുടെ കുടില മനുഷ്യരുടെ മനസ്സിന്റെ ലീലാവിലാസങ്ങള്‍ക്കെന്തിനാ,മാനുഷ്യനെയും, ശാസ്ത്രത്തെയും പഴിക്കുന്നത്.? ഇതൊരു നല്ല ഉദ്ദേശശുദ്ധിയോടു കൂടി മാത്രം കാണുക. നന്ദി.

രാജേഷ് ആർ. വർമ്മ said...

ജ്യോത്സ്യം തട്ടിപ്പാണെന്നു സംശയമുണ്ടായിട്ടും ഭാരതീയ സംസ്കാരത്തിന്റെ ഭാഗമാണല്ലോ, അതിനെ എതിര്‍ക്കുന്നതു ശരിയല്ലല്ലോ എന്നൊക്കെ വിഷമിച്ചിരിക്കുമ്പോഴാണ്‌ ഈ ലേഖനം വായിച്ചത്‌. യവനന്മാര്‍ കൊണ്ടുവണ്ടതാണല്ലേ? ഇപ്പോള്‍ ധൈര്യമായി. ഇനി എതിര്‍ക്കട്ടെ.

അശോക്‌, താങ്കള്‍ പണ്ടു മാതൃഭൂമി ആഴ്ചപ്പതിപ്പില്‍ കഥകളെഴുതിയിട്ടുള്ള മാവേലിക്കരക്കാരനാണോ?

Sujith S V Panicar said...

വളരെ നല്ല ഒരു ലേഖനമാണെന്നൈഞ്ഞു കേട്ടു വന്നപ്പോളേക്കും താമസിച്ചുപോയി. എന്തായാലും വളരെയേറെ ചിന്തിക്കാനുള്ള കാര്യങ്ങള്‍ തന്നെ.
കോപ്പീറൈറ്റ് പ്രശ്നമില്ലാത്തിതിനാല്‍ ഒരു പ്രിന്റെടുക്കുന്നു. വീട്ടിലേക്കു കൊണ്ടുപോകണാ.
ഇനി വീട്ടില്‍ അമ്മയെ കാണിക്കുമ്പോള്‍ എന്തു പുകിലാണോ ഒണ്ടാകാന്‍ പോകുന്നത്.! മിക്കവാറും “മോന്റെ സമയം ശരിയല്ല ഒന്നു നോക്കിക്കണം” എന്നു പറഞ്ഞു ആസ്ഥാന ജോതിഷികളെ തപ്പിപോകുമോ ആവോ?

അശോക് കർത്താ said...

രാജേഷ്ജി, താങ്കളുടെ ഊഹം ശരിയാണു. ടി.കെ.എമ്മില്‍ ഏത്‌ കാലമാണു പഠിച്ചതു? കൂടുതല്‍ വിവരങ്ങള്‍ അറിയാന്‍ താല്‍പര്യം

http://www.orkut.com/Home.aspx

യദുമേയ്ക്കാട് said...

taan